红魔鬼赛后评 足总盃 曼联 1-1 富咸 (Pen 3-4) (2-3-2025) 图片来源：manchestereveningnews.co.uk 1. 十六强毕业，卫冕失败，以曼联今季既表现加埋伤兵满营，其实有咁既结果唔意外。2. 整体而言，上半场冇乜创造到乜嘢机会，下半场同加时有改善，但咁多攻门最后只系入得一球。不过对面富咸都唔差，有几下有威胁射门，好彩今日既Onana正常返，加埋迪列治真系好似上咗身咁，好似边度需要防守时都会见到佢出现咁，所以双方都只系各自入得一球。3. 上半场如果讲形势我觉得四六波，曼联四、富咸六，早段艾历臣发挥唔错，但随住比赛进行，慢慢开始沉咗落黎，连带曼联既表现都一齐下跌。 4. 其实上半场双方都冇乜特别好既攻势，贺隆有一下近门抢点但比人力压之下射咗出界，而佢除咗呢球之外，之后一样系咁迷失，延续佢既入球荒。5. 输果球又系输角球，几时先解决到死球防守问题？完全冇人留意到喺角球攻势入面对方巴斯既走位，最后马莎拉维系唯一起动果个，但已经太迟。6. 下半场阿莫林调动好大胆，收起唯一防中乌加迪换入加拿祖。诚然，加拿祖系仲有好多改善既地方，但入波果球佢同Dalot既配合好靓，只系跟住佢又开始败家，有两三下单刀比人力压之下射比龙，就算唔讲呢样，佢前插入左面禁区时啲决定又系差，如果佢有几球肯传，话唔定可能入咗，你射唔系唔得，但你可唔可以搵球射中龙。7. 最后又系要靠般奴挺身而出，呢球入摄得靓，但其实唔易射，讲坚般奴都算系咁了，有时表现未必好好，但态度一定系100分。 8. Chido Obi入替贺隆之后有一段时间都唔系好见影，但随住时间开始入局，啲走位非常唔错，比起贺隆出色，但佢处理射门，我依然觉得佢实在太紧张，4次射门机会得最尾果次射得算似样，但系比Leno反应劲快救出。其实一路睇我一路好想Obi入波，佢今场既发挥黎讲值得一个入波，但佢自己把握唔到其实都系有少少自己攞黎。但点都好，以一个17岁年青球员黎讲，佢今场真系唔止合格，仲算系超额完成。9. Obi个老友天堂仔希云都上演地标战，而佢既表现都实在表现得唔错，仲出色过连迪路夫，冰人老实讲，真系算差，有下解围挞Q劲肉酸差啲出事。10. 我睇法就系Obi同天堂仔都ready踢一队，唔好将个重担加比佢哋住，咁样系拔苗助长，但每场比三十分钟佢两个，等佢哋慢慢进步，甚至间中有正选踢，我觉得系可以的。 11. 另外，舒克斯真系越踢越好，加时有几球直头球王级咁款，将个波玩到好似自己身体一部份咁，只系可惜去到互射十二码时怇射得算核突。12. 输十二码冇得好讲，但冰人同舒克斯呢两球其实又冇力度又冇角度（尤其冰人果球），真系搏龙门捉错路，偏偏Leno两下都捉到。13. 最后可以捱到入十二码大战，其实Onana居功不少，之前踢得差要弹，但今场佢踢得好系要赞，佢今日救咗三下靓波，果三下虽然未必至于神救，但系角度都刁钻，我怀疑前几场发波瘟既佢应该救唔到，虽然输波，但希望呢场波可以帮佢提升返自信，因为巴恩迪亚都唔知仲要抖几耐…我觉得如果系巴恩佢伤咗，以阿莫林手起刀落既做法，之前越踢越差既Onana应该会坐下先，比巴恩迪亚踢正选，只可惜巴恩真系伤得唔合时。 14. 另外同样要大赞迪列特，条友真系食咗药咁款，下半场开始包咗、截咗劲多有威胁既波。15. 而家唯一争标希望就系欧霸，但系以佢哋今季既表现加埋伤兵满营，我一啲都唔乐观，如无意外应该四大鸡胸了。曼联Page︰ https://www.facebook.com/manutddailyinfo/更多专栏内容︰ https://www.leafopenleafopen.com/unprofessional9up更多小说内容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio广告时间 - ig: leafopen3instagram.com/leafopen3 fb: leafopenleafopenfacebook.com/leafopenleafopen 如果有兴趣睇下我既其他写作作品，可以上 https://leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B如果觉得我写嘢OK想请我饮杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938