字 缩小字型大小。
字 重设字型大小。
字 放大字型大小。
沉迷动漫电玩嘅独L如我，曾因为想扮高达驾驶员 – 希罗 (非独 L 嘅你可自行 google 佢系乜水)，贪平走去迪卡侬买件棉质背心杀上针山，点知上到顶，件衫湿晒得嚟唔透气，差点焗到中暑…..直至「Fate」呢个品牌嘅出现，令嗰份幻想自己系希罗嘅童真再次浮现。
相信大部分人对「Fate」嘅认识都系嚟自其同名运动服品牌，价亷物美且造货量要求少，成近年跑会校服订制之热门选择。
跟大雄有几分相似嘅品牌主理人 – 杰哥，中学生模样，原来已系体育系大学毕业生。年青可以任性同样可以率性，有感一二线运动品牌价钱非一般学生所能承担，杰哥啪啪心口，毅然成立旨在提供价亷物美之运动服品牌。小本经营，注定难捱，大抵因为杰哥跟众多跑手一样，有着一股死不放手嘅执着，「Fate」近年终获不少跑友垂青，追随者更自发成立跑团一同练习互相鼓励，「Fate 跑会」嘅出现绝对意料之内。
意料之外嘅系，只要购买「Fate」嘅产品就可免费加入，每周跟大伙儿练习。介绍返，「Fate 跑会」绝非纯开心至上嘅 social run 跑团，而系有 pacer 有 program 有 target 嘅认真跑班，杰哥继续坚持率性到底。
----- 广告 Ad -----
广结大小跑会，察觉好嘅跑会总能汇聚一班不为利益不计较嘅跑友。物以类聚，「Fate 跑会」有唔计较嘅教练、Pacer、摄影师、跟拍专员，甚至按摩技师……对，你无睇错，系按摩技师。每次操练过后，Fate 众弟兄姊妹就会躺于地上，互相拉筋推拿按摩，此起彼落嘅笑声粗口惨叫声，逢周三晚充斥于葵涌运动场嘅某角落，但更多嘅系青春嘅汗水与跑步嘅热诚。
置身于呢个如此大爱，毫无金钱交易毫无利益关系嘅团队中，让人稍微有一份超现实嘅纯真，整个晚上，众人皆尽情地跑、开怀地笑、忘我地叫，仲有我最欣赏嘅放肆地互串。
返回现实，假使成立跑会只因品牌推广，但若然当中嘅人、事与物无爱无火无温度，再硬推亦只系一批缺乏灵魂嘅死物它，况且近年跑步市场上也太多卧虎藏龙吧 !
问到杰哥咁样搞跑班点为生，佢淡淡然地答 :「无谂呀，唯有希望你哋买多一两件衫裤啦」。呢种威化般乾脆嘅青春格外让人神往。
