「买人紧要还，要俾钱中介。」最新由英格兰足总 (FA) 公布嘅数据显示，由 2024 年 2 月到 2025 年 2 月期间，车路士俾咗高达 £60.38m 嘅费用俾足球经理人 (Football Agents)！无错，系六千万镑！呢个数字再次「蝉联」英超榜首，大幅抛离第二位嘅曼城 (£52.1m)，接近多咗成千万镑。如果再睇埋对上一期 (2023 年 2 月至 2024 年 2 月) 嘅数据，车仔俾嘅 Agent Fee 更加系夸张嘅 £75.14m！ 图片来源：i.ibb.co 连续两年做「英超水鱼王」，车迷相信会叹晒气摇晒，心里再暗骂牙Todd然后怀念油王的好，再向天狂呼点解我哋车仔要俾咁多钱啲 Agent？呢啲天文数字嘅「中介费」，到底系管理层为咗快速换血、签入心仪目标嘅「必要之恶」，定系反映咗球会喺谈判桌上做咗「大水鱼」、俾人揿住抢？呢种「肥经理人、瘦球会」嘅情况，喺 FFP/PSR 个箍越收越紧嘅今日，对车路士嚟讲又意味着啲咩？今次，我哋就攞齐数据，同大家深入拆解下呢个天价 Agent Fee 之谜。「中介」点解咁重要？拆解经理人费用结构 喺深入分析车路士盘数之前，请先容我用少少篇幅，简单讲下点解足球世界会有「经理人费用」(Agent Fee) 呢样嘢，同埋点解可以去到天文数字，如果你觉得自己一早就知，可以跳去下一段。简单嚟讲，足球经理人就好似球员嘅「代言人」兼「经理人」。佢哋嘅主要工作包括：同球会倾球员合约 (人工、奖金、年期、女朋友交俾边个管理等)促成球员转会交易 (帮球员搵下家，或者帮球会搵啱嘅球员)帮球员搵赞助同代言机会提供职业生涯规划、财务管理建议处理媒体关系，建立球员品牌形象 基本上，由球员搵工、倾人工、转工到接 Job，经理人都扮演住关键嘅中间人角色。咁佢哋点样赚钱？ 主要就系靠以下几款佣金。球员合约： 经理人通常会抽取球员年薪嘅 3% 到 10% 作为佣金。如果个球员年薪几百万甚至过千万镑，呢条数都几襟计。转会交易： 呢个往往系最大嚿嘅收入来源。经理人可以喺转会费入面抽取佣金，国际足协 (FIFA) 之前容许嘅上限系 10%。好似普巴 (Paul Pogba) 当年转会曼联，佢个经理人 拉奥拿 就袋咗成 €25m！夏兰特 (Erling Haaland) 去曼城单 deal，据闻经理人佣金都高达 €40m。呢啲佣金通常系由买家球会支付。赞助代言： 帮球员倾掂广告合约，经理人亦会分一杯羹，佣金比例可能系 10% 到 15%。 至于边个俾钱啦喎…… 视乎情况，可能系球员自己俾、球会俾，或者两边一齐俾。喺转会交易入面，买家球会俾佣金系好常见嘅做法。正正因为佣金可以咁高，加上顶级球星嘅转会费同人工屡创新高，搞到 Agent Fee 成为近年足球界一个好大嘅争议点。好多人觉得经理人赚得太多，推高晒转会市场嘅成本。FIFA 都尝试引入新规例去限制佣金上限（例如合约佣金 3%，转会佣金 10%），想增加透明度，不过就受到好多经理人反对，觉得佢哋嘅付出值得更高回报。了解咗呢啲背景，我哋再睇返车路士嗰 £60m / £75m 嘅数字，就大概知道呢笔钱点解可以咁庞大，同埋点解会成为 FFP/PSR 计算入面一个唔可以忽视嘅部分喇。 车仔盘数解密：点解贵得咁离谱？好喇，知道 Agent Fee 点计之后，核心问题就嚟喇：点解车路士连续两年俾嘅钱，会远远抛离其他英超对手，甚至系同样大驶嘅曼城？拆解落嚟，可能同以下三个因素有关：原因一：海量交易堆砌出嚟嘅「总和」最直接嘅解释，可能就系车路士喺呢两年进行嘅交易数量实在太惊人。睇返足总公布嘅交易列表，由 2024 年 2 月到 2025 年 2 月呢个周期，车仔唔单止系一队层面有大量操作，连青年军甚至教练团都有唔少变动需要经理人介入。买人方面： 永久转会签入咗例如 贺尔 (Dewsbury-Hall)、马克古尔 (Marc Guiu)、基利文 (Omari Kellyman)、维加 (Renato Veiga)、安瑟美路 (Aaron Anselmino) 等等，仲未计借用辛祖 (Jadon Sancho)、同埋柏度尼图 (Pedro Neto) 交易。 卖人/外借： 加拉查 (Gallagher)、马臣 (Maatsen)、卡些迪 (Casadei) 等离队，仲有菲历斯 (Felix)、基柏 (Kepa) 嘅外借安排。续约/新注册： 重要球员好似 彭马 (Palmer)、积臣 (Jackson)、梅迪历 (Mudryk) 续约或者调整合约，仲有大量青训球员例如 基卓斯 (Gilchrist)、麦古里治 (Harry McGlinchey)、佐治 (Tyrique George)、美卡 (Shumaira Mheuka) 等等嘅新合约或者注册。教练变动： 马利斯卡 (Maresca) 上任取代 普捷天奴 (Pochettino) 嘅合约处理同解约金，仲连带双方的教练团队都要计埋，车路士仲系上年挖角左宾福特的死球教练，呢类支出都唔系少。可以想像，每一单交易，无论大小，只要有经理人参与，就会产生相应费用。咁多单刁加埋，条数自然就滚到 £60m / £75m 呢个级数。某程度上，呢个天价 Agent Fee，可能就系球会近年疯狂买卖、频繁操作下嘅直接「副产品」。 原因二：「御用」经理人网络定系交易太复杂？睇真啲交易列表，会发现有啲经理人或者机构嘅名字反覆出现喺车路士嘅交易入面。例如超级经理人 佐治 文迪斯 (Jorge Mendes) 就参与咗菲历斯同柏度尼图嘅交易；Emeka Obasi 除咗搞掂辛祖借用，仲涉及唔少青年球员嘅合约；Frank Trimboli 同 Paul Martin 亦都系多单一队交易嘅关键人物 (例如彭马续约、KDH加盟)；Ali Barat 更加系处理咗积臣续约同埋多单球员离队交易。呢度就有个疑问：系咪因为车路士过份依赖某几个「关系密切」嘅经理人网络去促成交易，搞到喺佣金谈判上冇咁有利？定系因为车仔想签嘅目标、想做嘅交易本身就比较复杂，例如基利文 (Kellyman) 单 deal 有成 3 个经理人加埋分包商，维加 (Veiga) 单 deal 又有 3 个经理人代表唔同角色，令到中间费用水涨船高？无论边个原因，睇怕都系推高总费用嘅因素之一。 原因三：管理层策略定系「水鱼」本色？最后一个可能性，就系一个字，蠢！呢种天价 Agent Fee，究竟系新班主 清湖资本 (Clearlake Capital) 同 保利 (Todd Boehly) 为咗喺短时间内彻底改造球队、签入大量目标而有策略地「豪俾你」，认为呢笔钱系加速换血过程嘅「必要成本」？虽然近年转会操作名义上已经由体育总监团队 (例如 Winstanley 同 Stewart) 主导，谈判细节未必再系「班主亲自落场」。但系，整体嘅转会策略、开支预算同埋球会方针，始终系由班主同董事会所制定。会唔会系对面知道车仔想买人就开天索价，连带 Agent Fee 都特别贵，变咗第二队「曼市红色」嘅代表？老实讲，外人好难断定真正原因。可能三样因素都有啲。但无论如何，连续两年俾嘅 Agent Fee 都远超所有对手，呢个现象本身已经好值得车路士管理层同球迷去反思。 天价费用有咩后果？FFP 同形象双输俾咗咁多钱 Agent，除咗肉赤之外，对车路士嚟讲仲有咩实际影响同长远隐忧？最直接嘅冲击，一定系 FFP/PSR 条数。 无错，呢 £60m / £75m 嘅 Agent Fee 唔系独立嘅，佢系会计入球会嘅营运开支，直接影响盘数计出嚟系赚定蚀。The Athletic 篇报导已经讲明，我哋喺欧洲足协 UEFA 嘅 FFP 规则下已经「爆煲」，需要同佢哋倾点样「和解」。虽然靠卖女子队、卖酒店呢啲「财技」，帐面上可能勉强过到英超 PSR 条线，但系咁高昂嘅 Agent Fee，无疑令到合格难度大增，长远嚟讲亦都拖累咗球会真正达致收支平衡嘅能力。想持续发展？咁样大使法肯定系一大阻力。其次，就系资源分配嘅问题。 成几千万镑「倒落鹹水海」俾咗班 Agent，呢啲钱如果用喺其他地方，例如直接用嚟签更高质素嘅球员、改善训练设施、甚至回馈下球迷减下季票价钱，系咪会更加实际、至少主场唔使再俾球迷开汽水先丫？而家咁样「肥上瘦下」，益晒班中间人，对球会本身嘅发展，似乎冇乜直接帮助。 最后，就系球会形象同谈判力受损。 连续两年做「英超水鱼王」，俾全世界嘅球会、经理人知道车仔取代曼联成为「好劏」、「人傻钱多」的代表，对将来买卖人、倾合约肯定冇好处。人哋见你咁疏爽，开价自然更加狼死，Agent 佣金要求亦都可能更高，变相令我哋之后嘅交易成本继续居高不下。呢个负面嘅「水鱼」形象一旦确立咗，真系唔容易洗得甩。无论管理层当初盘算系点，呢个天价 Agent Fee 嘅持续出现，唔单止加重咗球会嘅财政负担，仲可能影响资源运用同市场形象，绝对系一个需要正视嘅问题。资料来源：https://www.thefa.com/news/2025/apr/14/payments-and-transactions-140425======================================== Facebook Page已经开咗啦！如果锺意我的文章可以入黎按个赞！⭕️车迷狗up天地 ❌https://www.facebook.com/profile.php?id=61566593983419