上年夏天，年仅21岁嘅葡萄牙「通天老倌」维加 (Renato Veiga) 以 €14m 身价由巴素利加盟车路士，佢嘅多功能性被视为完美契合马蛇战术嘅「瑞士军刀」。正当大家期待佢点样融入球队之际，点知踢咗半季都冇，就喺今年一月被外借去意甲劲旅祖云达斯，令唔少车迷 R 晒头。究竟系咩原因令佢咁快出走？佢喺意甲嘅表现比起喺车仔又系咪真系升咗Lv？最重要系，外借完一季之后，呢位小将喺车路士仲有冇未来、仲争唔争到个位？今篇文章就同大家深入拆解，用数据分析下维加呢次外借嘅来龙去脉，同埋佢返嚟之后嘅前景。 半季即闪？维加外借祖记为咗乜？维加加盟之初，大家都对呢位身高 1米9、左脚纯熟、可以胜任中坚、左闸甚至防中嘅小将抱有期望，认为佢嘅多功能性啱晒马蛇嘅口味。但点解呢位被寄予厚望嘅小将，嚟咗车仔短短六个月就执包袱，被外借去祖云达斯呢？背后原因其实相当复杂，并唔系单纯一句「唔够班」可以解释。 上阵时间与国家队梦想： 最核心嘅原因，莫过于 稳定上阵时间 嘅渴求，特别系为咗保住佢喺葡萄牙国家队嘅位置。根据 The Athletic 嘅报导，截至今年一月外借前，维加喺竞争最激烈嘅英超联赛，竟然只得 1次正选，佢喺欧协联同盃赛虽然系有啲机会，但对于一个啱啱喺国家队踢稳正选嘅年轻球员嚟讲，咁零碎嘅时间绝对唔够。佢需要持续喺高水平比赛中上阵，先可以锁定自己喺国家队嘅席位。 马蛇用法与位置错配： 另一个关键问题系，马蛇点样用佢。虽然维加系通天老倌，但佢喺国家队主要系踢 中坚。喺车仔，马蛇似乎更倾向将佢放喺 倒置左闸（Inverted Left-Back） 嘅位置。马蛇喺记者会都讲过，认为维加喺车仔踢左闸先令佢得到国家队徵召同其他球会嘅关注，仲话球员要识得适应唔同位置。言下之意，似乎马蛇欣赏佢嘅多功能性，但未必打算俾佢长期担任佢最想踢嘅中坚位。事实上，喺英超，左中坚嘅必然正选系高维尔（Levi Colwill），维加只系喺两场欧协联比赛试过客串中坚。更甚嘅系，喺一月份科芬拿（Wesley Fofana）同巴迪亚舒尼（Benoit Badiashile）两大中坚受伤嘅情况下，车仔嘅选择系查询前青训古希（Marc Guehi）嘅价钱，然后 回收外借嘅查洛巴（Trevoh Chalobah），而唔系内部提拔维加顶上中坚位。呢个举动，无疑向维加发出一个强烈讯号：喺马蛇嘅蓝图入面，佢暂时唔系中坚嘅优先人选。 → 祖记招手与外借条件： 正当维加喺车仔嘅前景变得不明朗，祖云达斯就把握机会伸出橄榄枝。当时祖记因为首席中坚布蓝马（Bremer）重伤，急需补充中坚人手。主帅莫达（Thiago Motta）向维加亲自讲解战术角色，仲要俾咗笔相当可观嘅 €5m（另加 €1m 奖金）纯外借费用。呢笔「诚意金」唔单止令车仔满意，亦令维加确信自己去到祖记会受到重用。值得一提嘅系，虽然当时有其他球会（例如多蒙特、马赛）想买断维加，但球员本人明确表示 只想外借，唔想永久离开车仔。最终，车仔亦从善如流，喺确保符合特定条件下，同意咗呢次纯外借。可以话，维加外借祖记，系一个球员为咗争取上阵时间（尤其系心仪位置）、实现国家队目标，同时球会亦能喺冇损失球员拥有权下收取借费嘅「三赢」局面。当然，前题系维加要喺意甲证明自己。咁佢又做得点呢？下文再用数据详细分析。 意甲数据 VS 车仔数据 大比拼维加外借祖记系为咗证明自己。咁佢意甲「留学」表现点？比较下佢喺两队嘅 Per 90 数据：防守：效率大提升最大分别系防守效率。喺祖记，佢嘅 铲截成功率 由车仔时期嘅 33.3% 大幅提升到 61.5%，虽然尝试次数少咗，但明显更有效率。拦截 次数略增 (1.18 → 1.41)，而 解围 次数更由 1.00 次 激增到 4.74次，接近五倍增长，强烈暗示佢主要踢中坚，而且表现更稳健。传球：更準更向前维加嘅左脚传球亦有进步。整体传球成功率 (84.9% → 88.2%) 同 长传成功率 (61.9% → 65.2%) 都有提升。更有趣嘅系，虽然总传球次数减少，但 向前传球 (PrgP) 反而增加 (3.5 → 4.23)，显示佢传球更精準同更具方向性。 盘带：角色明显转变盘带数据最能反映角色转变。佢喺祖记嘅 触球次数 (83.5 → 66.5)、向前带球 (PrgC) (2.00 → 1.03) 同 尝试过人次数 ( 2.5 → 0.26) 都大幅减少，几乎唔会扭波。清晰显示佢踢法更似传统中坚，专注防守同传球。综合以上数据，维加喺祖记防守效率同传球质素有明显进步，踢法亦更似纯中坚。当然要考虑意甲同英超嘅差异，但进步系实在嘅。咁样嘅表现，返嚟车仔够唔够争位？伤患阴霾与回归前景：维加仲有冇车仔位？维加喺祖记踢出表现，自然引嚟买断嘅传闻。根据意大利媒体 TuttoJuve 嘅报导，祖记系想留低佢，但车仔标价 €20m，祖记就希望可以倾平啲。考虑到维加份约去到 2031 年仲有加一年选项，车仔喺谈判上绝对有牙力。咁如果倾唔成或者维加自己想返嚟，佢喺史丹福桥仲有冇位企呢？ 位置竞争，僧多粥少： 维加嘅多功能性反而令佢难搵位。左闸 位有坐稳正选嘅 古古尼亚，而且维加自己都未必想踢返呢度；佢最擅长嘅 中坚 位更加系重灾区，高维尔 稳佔左中坚，仲未计 巴迪亚斯尔、科芬拿、查洛巴、阿迪拉比奥尤 等一大堆人争位，想抢正选难过登天；防中位亦有必然主力 卡些度 同可能复出嘅 拉维亚，下季仲要有外借归队的黑工山度士。简单讲，无论踢边瓣，前面都已经人山人海，想搵个稳定正选位真系唔容易。 马蛇 VS 球员：谂法同唔同？ 马蛇强调球员要适应唔同位置。佢会点睇维加喺祖记专注踢中坚嘅成功？定系仍然想佢做万能 Key？另一方面，维加经历过祖记正选中坚待遇，仲肯唔肯返嚟做后备，甚至踢返唔系最擅长嘅左闸？呢个系潜在矛盾点。 未来剧本：留队、再借、定卖走？ 综合以上因素，维加下季去向有几个可能： 1. 留队竞争： 除非马蛇俾到中坚位嘅承诺，或者有人离队/受伤腾出空间，否则留队都未必有稳定机会。2. 再次外借： 如果留队冇足够上阵时间，为咗发展同国家队位置，再借走系合理选项，但考虑到外借人数的上限，车仔未必愿意再浪费一年系佢身上。3. 永久转会： 如果有球会肯出 €20m，考虑到 PSR 同阵容深度，本身买价只系 €14m，加埋外借费用，车仔可能会选择套现都唔定。总结：老实讲，而家睇返维加单deal，有啲球迷（包括我）可能会觉得，根本有啲似「骗案」：明明当初签佢返嚟，睇落就系想佢做古古后备，填补左闸个窿；点知嚟咗半季就话要踢中坚先肯踢，搞到要外借去祖记。究竟佢下季会系马蛇计划嘅一部分，定系又一个匆匆过客，甚至直接被卖走套现？睇嚟真系要等夏季转会窗先有答案。 ========================================Facebook Page已经开咗啦！如果锺意我的文章可以入黎按个赞！⭕️车迷狗up天地 ❌https://www.facebook.com/profile.php?id=61566593983419