少有既双红会系由第十四位既曼联对第二位既阿仙奴，曼联凭般奴费南迪斯系上半场补时阶段射入罚球而领先，而阿仙奴则靠怀斯系74分钟妙射得手追平。两队最后以一比一完场，各得一分。《阿仙奴可以专注欧联》阿仙奴伤左耶苏仔同夏维斯后，阿迪达只能将美连奴硬推上前一格打箭头，而翼锋萨加仍未能复出，达叔起用小将亚旺尼担正。虽然今场亚旺尼系边线非常落力，多次联同奥队同添巴系度造文章，但级数同萨加比就当然有距离，加上中锋点乏力，整队攻力大受影响下，球队虽有控球权，但真系要埋到龙门口既机会唔算真系太多，有一两下黄金机会亦因太心急而把握唔到，最后只能逼和对手。踢完呢场后，阿仙奴已落后榜首既利物浦十五分（打少一场），要后上夺冠都仅余数字上可能，余下赛事唯有全力专注欧联，联赛就真系变Netflix FC下季见。 《曼联踢防反入晒血》周中曼联作客被皇苏逼和，从战情上睇，曼联过几日番主场赢既机会率系比较大，但阿摩廉冇选择留力下场，而决定系呢场波尽量出主力去应付阿仙奴。由于多古停赛同麦前队长加入受伤名单，阿摩廉决定起用约罗、连迪路夫同迪列特，而天堂仔就先列后备。中场方面，先抽起哥利亚，起用般奴同卡斯美路。一对翼衞照用马沙拉维同达洛治。前锋线则先抽起海伦同马田仔，起用舒克斯、加拿祖同艾历臣。今场阿摩廉直头改踢防反，球队一失控球就缩到中后场防守减少后场空间，放弃控球权等阿仙奴攻。抢到波后就放长波俾右路既加拿祖系边线打反击。因球队放弃高位逼抢，5-4-1防守阵形系中后场比较紧密，大大减少左卡斯美路速率不足既问题，相反更用到佢既补位同防守企位既经验，从而令阿仙奴制造唔到好多威胁。可惜，前锋线三人只得加拿祖有速度，舒克斯同艾历臣都需要用到波先可以发挥到，导致反击时既效果比较一般。虽然阿摩廉系出场人脚配置下系有不足既地方，但曼联踢防反真系入晒血，般奴一脚送前，就算得单边走反击都够走。马后炮睇，海伦应该比舒克斯更适合踢呢家波，而翼锋方面，有冇条件系青年军提升一个上黎试，会系阿摩廉需要谂既野。呢个踢法上，艾历臣既作用真系冇乜，反而舒克斯系前场停到一两下都算系咁。 《曼联机会少但入肉，尾段搏鎚就两边都有机赢》一场攻守格局既波，两队系上半场都唔系制造到好多埋门机会，而曼联单靠反击有一两下去到阿记心脏地带仲有威胁。情况去到70分钟后有改变，系怀斯追成平手之后，两队都唔想拎一分而开始对攻。阿仙奴有马天尼利系窄位补射飞机唔入，而曼联则有般奴9码点近距离射门俾拉也挡到，拉也接住再黎下飞身系门口拍走个波，挡住哥利亚既冲门。要数阿仙奴踢得最好都应该系门将拉也，否则阿记分分钟一分都冇；曼联就要数到加拿祖、般奴同马沙拉维。加拿祖明显适合防反加系边线活动，球队今场多次既进攻威胁都系黎自佢既推进；般奴基本上已确立佢系队入面踢既位置，逗番后一格踢再周不时后上入禁区会较适合佢；马沙拉维今场就上上落落，除左完封托沙，亦有一下怒跑几廿码系门前撞射被救出，只能讲拉也太神，否则马沙已经入左波。 《总结》曼联既防反DNA真系入晒血，对强队要咁踢系岩晒河车，但要变番做强队就真系需要一段颇长既时间。约罗半场已被换出，相信佢又系伤左。幸好，入替既天堂仔表现不俗，下场睇黎会担正。黎紧礼拜四再对皇苏，曼联搏完呢场后，一众正选球员恢复如何会系果场波既关键，尤其系卡斯美路。欧霸冠军既重要性唔驶讲，希望球队会放弃联赛，全力争冠就好。