对大部分球迷嚟讲，三月系一个平淡嘅月份，转会通常唔会系呢个时候出现，顶多都只系转会传闻，一般球会都系等到暑假转会窗先有动静。但系车路士今次偏偏唔走寻常路，选择喺三月提前完成咗两笔总价高达£62M嘅转会，分别签入士砵亭嘅20岁防中Dário Essugo同17岁翼锋Geovany Quenda，其中Essugo今年夏天会正式加盟，而Quenda就要去到2026年先正式到队。《The Athletic》报导指出，今次车仔咁急住出手，最大嘅原因就系激烈嘅竞争。据报导话，曼联同其他英超前列球会已经展开咗对Quenda嘅争夺战，而Essugo更加吸引到5至6队球队嘅关注。车路士唔想再重蹈之前错失好球员嘅覆辙，提前锁定目标系最好嘅做法。 球会内部人士亦透露，提早完成交易并唔系一时兴起，更系车路士未来整体转会策略嘅重要一环。球队希望喺六月底前搞掂绝大部分嘅转入同转出工作，尤其今年特别需要签入一名前锋同一名惯用右脚嘅翼锋，务求尽快确立阵容应付来季嘅英超、国内盃赛同欧洲赛事。提早完成转会仲可以避免球员加盟太迟而影响融入球队嘅速度。最明显嘅例子就系Caicedo，2023年车路士以£115M嘅破纪录转会费签入佢，但由于八月中旬开季之后先正式加盟，令佢需要更长嘅适应期，对球员同球队嚟讲都系一种损失。球会亦希望避免去夏「炸弹部队」嘅情况重演。当时因为太多球员未能及时离队，对球队内部造成唔少干扰，令新任教练马蛇相当头痛。今年车路士已经提前着手，透过出售或者外借尽快处理呢啲问题球员，为新加盟球员腾出空间同资金。现时车路士需要处理嘅球员名单包括： Axel Disasi（外借到维拉，未有进一步消息）Ben Chilwell（外借合约无买断条款）Carney Chukwuemeka（外借多蒙特，有35M买断条款但多蒙特已表明唔会启动）Raheem Sterling（阿仙奴已表明季尾将会送返车路士）Armando Broja（外借到爱华顿，但伤患不断）Kepa Arrizabalaga（传闻将以6M正式加盟般茅）今年夏天车路士更加会参与世界冠军球会盃（Club World Cup），首战将喺6月16日举行，如果晋级决赛更要打到7月13日。英超比赛则喺8月16日开锣，留俾球队备战嘅时间实在好紧凑 (当然，作为车迷我就好有信心队波入唔到决赛)。所以球会内部将呢个比赛当成季前热身赛，希望新加盟球员即使未能正式上场，都可以透过呢段时间尽快融入球队战术同文化。 从长远角度嚟睇，车路士明确表示提早转会唔会系一次性事件，而系未来每年嘅常态。球会已经做好充分嘅前期準备，未来每季都会愈嚟愈早完成转会计划，为球队建立更稳定嘅阵容同更充裕嘅準备时间。Blue Co. 继超长约之后，今次又尝试打破欧洲列强的转会窗限制，到底其他球会都会跟风咁玩定系继续保留传统呢？而车仔系咪真系能够系6月16日之前完成前锋同翼锋嘅重要转会，呢啲就要时间证明啦。文章来源：https://www.nytimes.com/athletic/6221841/2025/03/23/chelsea-transfer-business-march-why/========================================Facebook Page已经开咗啦！如果锺意我的文章可以入黎按个赞！ ⭕️ 车迷狗up天地 ❌ https://www.facebook.com/profile.php?id=61566593983419