曼联凭般奴费南迪斯十二码梅开二度，加上自己边走边射再入一粒，再加上达洛治门前撞射埋斋，以四比一大胜皇苏晋级欧霸盃八强，八强对手将会系里昂。《阿摩廉既调整》后防兵源紧绌情况下，阿摩廉大胆起用小将天堂仔希云出任左中坚，拍住迪列特同马沙拉维。卡斯美路连续第三场正选拍住般队长踢防中。达洛治同多古踢番顺足翼衞。加拿祖同舒克斯踢左右进攻中场。前锋海伦复任正选攻坚。今场球队进攻态度积极，继续以两边侧击为主要进攻手段。球队系阵地进攻时改踢3-1-1-5，防线连同卡斯美路做rest defense，后场保持三个出球点，而般奴移前一格踢得更自由。加拿祖就改踢最边，清空half-space位置等达洛治后上，而左面多古就依旧拉边做单人爆破；舒克斯就系左路同中路周围串连；前锋海伦则系禁区入面搵食。经调整下，最大得益莫过于系加拿祖。此子惯左系边路持球推进突破。今场佢收到既指令就系右路突破同出波，有机会先扣入大位起左脚扣关。另外，左中坚既希云仔既惯用脚系左脚，顺边顺脚情况下，佢更可以帮手后场用波而非简单交下波。此子都相当有胆色，防守技术亦不俗，绝对有能力站稳正选。球队今日系进攻方面就真系有侵略性，多次成功制造到黄金机会埋门。虽然整队计入左四球，但如果把握力再好些少，入够半打都有机。 《踢得好要赞》今场赢波绝对需要赞几位球员。第一个系天堂仔，表现非常称职。第二个就系多古，基本上佢一个人已经打爆左人地条右路。除此之外，仲搏到一个十二码，亦有多次突破同落底线传中。第三个要赞既系舒克斯，今场佢愈踢愈有，进攻时到处都见到佢。特别系佢黐波既技术认真高，同时佢同多古既配合亦做得比加拿祖好。佢中后段都有试过头顶脚踢攻门，可惜都系略欠运气。海伦今场亦不负我所望，虽然入唔到波，但起码系前场做到野，支点护波同捕位埋门都有效果。海伦面对次一级既对手，发挥既机会多左。今场亦有一次助攻同搏到一个十二码，但如面对高班少少既对手，佢又可唔可以交到表现就要睇过先知。般奴入三球就肯定系今场MvP，而佢入既第三球仲要怒跑几廿码，再接应加拿祖妙传，边走边射尾柱确系靓到冇朋友。不过，小弟个人会将MVP交俾无名英雄卡斯美路。今场佢踢出呢季最佳水準，防守方面既贡献不在话下，进攻时亦见番以前既中距离传送入禁区，尽显功架。莫非蛇占既访问真系激嬲左呢班人，令到佢地发愤图强？ 《总结》曼联赢呢场波系应该，因为皇苏既实力明显同曼联系有距离，特别系行军速率上系有明显差距。久保建英今场都出晒奶力，但对住大大旧又唔慢既多古，加埋后生仔唔怕死既希云，佢都冇乜计仔。曼联今场打出阿摩廉时代既代表作。除左见到球员开始熟习新位置，亦见到阿摩廉既调整，球队既整体实力系有所上升。不过唔好太开心，英超同欧霸赛事既级数完全唔同，下场作客李斯特城，肯定冇呢场咁易踢。曼联，继续加油！